Sis Tsiis! Aksje foar goed Frysk op skoalle

Tongersdei 22 desimber 2016 – It Saailân fol mei minsken al fier foar it begjin fan de demonstraasje. It bestjoer fan de Fryske Rie wie der fansels ek by. Der komme mear Sis Tsiis-aksjes. Komme jo dan ek? De foto is makke foar www.itnijs.frl. Sjoch dêr foar berjochten en sykje op “Goed 300 minsken” en foar oare berjochten oer de tige slagge aksje sykje op “Sukses foar sis tsiis!” Altyd nijs op itnijs!

sis-tsiis-22-des-2016

Frouljusmoeting 2016

Frouljusmoeting   21 o/m 24 septimber  2016

 Woansdei : 16.00 – 16.30   Menaam: Ynrin fan gasten en gastfroulju en in wurd fan wolkom.

Tongersdei: 9.00  Sammelpunt: gemeentehûs Menaam, Dyksterbuorren 16

Oer de Aldebiltdyk nei Aldebiltsyl; hjir in frisse noas helje. Oer Holwert en Wierum nei Peazens/Moddergat; kofje drinke yn de âlde garnalenfabryk, fiskershúskes en it fiskersmonumint besjen. Fansels sjogge wy ek efkes oer de dyk.

12.45   Fryske kofjetafel yn de Posthoorn yn Dokkum, Diepswal 21.

14.00   Besite oan it museum Dokkum: it Admiraliteitshûs, Diepswal 27. Wij kinne in kar meitsje tusken in steds-kuier of mei in pream fan it wetter ôf de stêd te besjen. Wa’t  klear is kin de stêd efkes yn.

17.00   Bij de auto’s op it parkearplak wêze. Yn de auto nei de Bonifatius boarne (kapel ?) oan de Bronlaan yn Dokkum. Dan mei de gastfrou werom nei hûs.

Freed: 10.00  Parkearje ûnder de Oldehove yn de parkeargaraazje Oldehove en sammelje ûnder de grutte muorre-beskildering fan Marijke Meu oan it begjin fan de Grutte Tsjerkestrjitte/Heer Ivostrjitte, op de sydmuorre fan De Brasserie

Nei in bakje kofje  gean wij om 11 oere nei it Keramykmuseum “It Prinsessenhof”. Nei ôfrin kinne wij meielkoar in broadsje ite (eigen rekken). De rest fan de middei frij .

19.00 Gesellige jûn mei stampotbuffet yn it doarpshûs ”Op Healwei” yn Skingen, Slappeterpsterdyk 13.

Sneon: 9.30 Doarpshûs yn Skingen

Mei elkoar noch in bakje kofje drinke en ôfskied nimme.

Kosten:

Om en de bij 85 euro p.p. + drankjes feestjûn (eigen rekken).  Wa’t sin hat om mei us mei te gean kin har( of him) opjaan by:

Jeltsje van der Mei, tel. 0518 451520 of jeltsje.menaaamapesturtsjegmail.com

Lêzing dr. Hajo van Lengen

Dr. Hajo van Lengen , âld-direkteur fan de Ostfriesische Landschaft, hâldt op sneon 9 april 2016 in lêzing oer it eardere fêstigingsgebiet fan de East-Friezen. Dy giet oer it ûndersyk dat er dien hat yn opdracht fan it BRD-ministearje foar Ynlânske saken. Dat hat te krijen mei it oant dan net opnommen wêzen fan de East-Friezen as erkende minderheid yn de Beratender Ausschuss für Fragen  der Friesischen Volksgruppe. De Sealterlanners, Noard-Friezen en Hilgelanners sitte dêr wol fan it begjin ôf yn. Van Lengen hat syn ûnderfinings ek te boek steld yn in nijsgjirrige publikaasje dy ’t yn 2014 ferskynd is ûnder nr. 232 by Verlag Nordfriisk Instituut yn Bräist/Bredstedt, ISBN 978-3-88007-391-3: Zwischen Ems und Weser. Die östlichen Siedlungsgebiete der Friezen.

Boeremoeting 2016

De 56ste ynterfryske boeremoeting sil wêze fan 3 o/m 6 febrewaris 2016, diskear yn ús provinsje.
Hjir stiet it programma: Boeremoeting 2016 – programma

Ynljochtings en opjefte graach foar 15 jannewaris 2016 by ien fan ûndersteande  minsken:
– Sjoerd van der Schaar, telefoan 0517-412492 of e-post s.vd.schaar@planet.nl
– Jan van der Weg, telefoan 0518-412369 of e-post wegvd000@planet.nl
– Doeke Wilman, telefoan 0519 724521 of e-post d.wilman@knid.nl

Útnoeging kongres

Útnoeging Ynterfrysk kongres fan 4 – 7 juny op Söl (Sylt) / Noard-Fryslân – Gur Frinj kum iin!

Lef Frinjer, bêste freonen!

De Ynterfryske Rie is in feriening fan de trije Fryslannen of in casu fan de trije seksjes fan de Rie yn West-, East- en Noard-Fryslân. De leden binne de leden fan de Fryske Rieden en it foarsitterskip wikselt elke trije jier. Seksje Noard hat it foarsitterskip oant begjin juny, seksje East nimt it dan oer. Dêrmei eindigje trije jier mei in tal ynterfryske gearkomsten sa as boeren-, frouljus- en bestjoerdersmoetings, in reis nei Hilgelân, gearkomsten fan it deistich bestjoer, miene gearkomsten fan alle leden en in protte ideeën.

Wy wolle besjen wat wy berikt hawwe en wêr’t wy hinne wolle. Wy stelle alle Friezen yn ‘e gelegenheid yn de prachtige natoer op it Noardseeeilân Söl trije dagen meiinoar te laitsjen, te diskutearjen en dingen te dwaan dy’t it bêste oanjouwe dat wy byinoar hearre. Elkenien is wolkom! Op syn Söltersk : “Gur Frinj kum iin!”

Mei hertlike groetnis,

Ilse Johanna Christiansen
Forwüset / Vorsitzende / foarsitter
Frasche Rädj / Friesenrat Sektion Nord

 (Net-autorisearre oersetting yn it Frysk, RCK)
P.S. It (Dútsktalige) struibiljet mei it programma en de gegevens steane hjir. Hy is ek op te freegjen op it ûndersteande adres.

Frasche Rädj
Friesenrat Sektion Nord e.V.

Vorsitz im Interfriesischen Rat 2012-2015
Friisk Hüs
Süderstraße 6
D – 25821 Bräist / Bredstedt, NF
T 04671 / 602 41 50
T 04671 / 602 41 51
E sektion-nord@interfriesischerrat.de
w www.friesenrat.de
w www.interfriesischerrat.de

Oanmelding foar dit 26ste kongres, sûnt 1925, en betelling (IBAN: DE462 175 000 000 1550 5134) moat ek op boppesteand adres, oant 8 maaie.

Hoewol ’t Söl (Dútsk: Sylt) in eilân is kinne jo rinnend, mei de trein of mei de eigen auto mei de autotrein fan Naibel (Dútsk: Niebüll) dêrhinne. Dat kostet mei de auto retoer € 90, passazjiers fergees (www.syltshuttle.de). Jo kinne ek mei de auto ride nei Havneby op it Deenske eilân (!) Rømø en dan mei de boat nei List op Söl (Sylt). Dat kostet retoer € 79 ekskl. oant 20% koarting by online-boeking (www.syltfaehre.de, passazjiers fergees). En yn 40 minuten fleane jo fan Bremen nei Sylt (€ 189 inkelde reis, www.flughaven-sylt.de).

It kongres wurdt holden yn Klappholttal besuden List (yn it Noarden fan it 30 km lange eilân), mei ûnderdielen yn ûnder oaren Weesterlön (Dútsk: Westerland) en Kairem (Dútsk: Keitum). Heal-oers-bustsjinsten op it eilân: www.svg-busreisen.de. Foar neiere ynljochtings (past reizgjen mei de bus yn it programma?) sjoch hjirboppe (Friesenrat Sektion Nord).